酒會Party中的話題肯定是漫無天際，唔識一定被佢嚇死，識就被佢笑死。當然，如果每次都是圍繞高爾夫球我驚都未驚過。

春節踫巧哥倫比亞號返回大氣層解體，七位太空員罹難，是太空探險的一大挫折。心裡很是惋惜，科學，到底不是萬能的；知識的追求，有時真要付是沉重的代價。

怎料雲吞麪大王老陳一見面便扮足專家﹕「老劉，聽講呢隻穿梭機撞到啲嘢大爆炸。你估會唔會撞到個黑洞呢？」

「嘩！咁都被你諗到！」我心想都係閃開為妙。

回憶起1969年人類第一次登陸月球，令我對太空無限響往。後來進大學，滿心選讀天文物理學，為的他朝能考進NASA工作。結果只修了一個宇宙學101已頂不順，更枉論成為主修科。現今我不被人把黑洞、大爆炸、星雲、白矮星等等說得琅琅上口所嚇窒，都是靠近二三十年坊間大量的普及科學書籍惡補，才得在一些場合中搭上兩嘴。

老陳見我沒正面答他，再追問﹕「有冇可能呢？」

我故作權威地說﹕「宇宙浩瀚，有什麼可能不可能。1971年Apollo 14第三次登陸月球，指揮官Al Shepard帶了一枝６號鐵桿*，在月球上打了兩枚高爾夫球才返回地球。我睇怕那兩枚高爾夫球還在太空，其中一粒重返地球時啱啱同哥倫比亞號撞到正。」

「嘩！咁都被你諗到至真！」老陳莞爾不而。

「月球都有地球六分一重力，高爾夫球點可以飛進太空？梗係呃你啦！不過，在月球上打過高爾夫球是真嘅。」我補充說。（完）

*有興趣讀者可以在上網重溫這錄影片段﹕http://www.hq.nasa.gov/office/pao/History/alsj/a14/video14.html

#####

本文原登於《明報周刊》專欄〈高球型而尚〉，現經作者修訂重刊。

[ #高球型而尚 ]